Yangiliklar
Qoraqalpog‘istonlik yoshlar IT-kasblarni puxta egallamoqda
Keyingi yillarda mamlakatimizda axborot texnologiyalari sohasi jadal rivojlanmoqda. Agar yetti yil avval 147 ta IT-kompaniya mavjud bo'lsa, bugungi kunda ularning soni 2 mingdan oshdi. Ularda 30 ming kishi yuqori maoshli ishlarda band. 70 mingdan ortiq yoshlar IT bilan mustaqil shug'ullanadi.
“O‘zbekiston 2030” strategiyasida bu boradagi eksport hajmini 5 milliard dollarga yetkazish, 300 ming yoshni ish bilan ta’minlash ko‘zda tutilgan. Chekka hududlarda ham IT-shaharlar tashkil etish boshlandi.
Jumladan, Qoraqalpog‘istondagi IT-park rezidentlari soni o‘tgan yil oxiriga nisbatan uch baravar ko‘payib, 108 nafarni tashkil etdi. Ular tomonidan 310 nafar mutaxassis ish bilan ta’minlandi. 2024-yilning birinchi yarmida xizmatlar hajmi 2,4 barobar, eksport hajmi esa 1,7 barobar oshdi.
Rezidentlar tomonidan 25 ming nafar yoshlar va davlat xizmatchilari o‘qitilib, ularning malakasi oshirildi. “Bir million dasturchi” loyihasi doirasida 2023-yilda 18 ming nafar, 2024-yilda esa 29 ming nafar yosh onlayn platforma orqali o‘qitildi. Joriy yilda 33 mingdan ortiq kishini tayyorlash rejalashtirilgan.
Bu natijalar yaratilgan shart-sharoitlarning ko‘zgusidir. Davlatimiz rahbari 2021-yilda viloyatga tashrifi chog‘ida IT-park uchun yangi bino qurish bo‘yicha topshiriqlar bergan edi. Shunga muvofiq Nukus shahri markazida 17 qavatli zamonaviy bino qad rostladi. IT taʼlim va kovorking markazlari, ofislar, konferentsiya zali va ofis xonalari mavjud. Binoda shuningdek, IT-park rezidentlari, sohada ishlayotgan investorlar va xorijiy autsorsing korxonalari joylashadi.
Ilgari ikki qavatli binoda ochilgan IT-park endi mahobatli majmuaga ko‘chib o‘tgani rejalar ko‘lamidan dalolat beradi.
Prezidentga sohada amalga oshirilgan ishlar, natijalar va rejalar haqida ma’lumot berildi.
Masalan, ilgari Amerikaning Amazon kompaniyasida ishlagan qoraqalpog‘istonlik Beknazar Abdikamalov vataniga qaytib, HUPO startapiga 4 million dollar sarmoya jalb qildi. Davlatimiz rahbari u bilan suhbatlashdi, tashabbuslarini qo‘llab-quvvatladi.
Davlatimiz rahbari IT-park rezidentlari va axborot texnologiyalari sohasida faoliyat yuritayotgan mutaxassislar bilan suhbatlashdi. Yoshlarning fikr-mulohazalarini tinglab, ularning takliflarini qo‘llab-quvvatlash yuzasidan mas’ullarga topshiriqlar berdi.
“Agar bu sohada startaplarni amalga oshirsak, sohalarda unumdorlik oshadi, davlat xarajatlari qisqaradi, yoshlar uchun ish o‘rinlari yaratiladi, – dedi Shavkat Mirziyoyev.
Binoda UZINFOCOM markazining filiali ham joylashgan. Markaz uStudy dasturi orqali viloyat yoshlarini zamonaviy kasb-hunarlarga o‘rgatadi. Malakasini oshirgan kadrlar o‘z sohasi bo‘yicha zamonaviy korxonalarga ishga joylashtiriladi.
Prezidentimiz davlat-xususiy sheriklik asosida barcha hududlarda IT-parklar uchun shunday ko‘p qavatli binolar qurish zarurligini ta’kidladi.
– Ularda shunday muhit bo‘lishi kerakki, yoshlar o‘zlarini erkin his qilsin. Bu erda hamma narsa ovqatlanish, dam olish, sport va boshqalar uchun bo'lsin. Binolar shahar markazida, yoshlar uchun qulay joyda joylashgani ma’qul, dedi davlatimiz rahbari.
Mazkur IT-parkni Qoraqalpog‘iston viloyatlaridagi maktablar bilan bog‘lash, sohaga qiziquvchi yoshlarni o‘rgatish, kelgusida yuqori rentabelli ishga jalb etish bo‘yicha ko‘rsatmalar berildi.
Axborot ko`magi
